A Siradella
Toca a foto para ampliala
Introdución
O punto máis alto da península, a uns 166 metros sobre o mar: o mellor balcón sobre A Lanzada e o espazo natural Umia-O Grove.
Descrición
Desde a plataforma de madeira do miradoiro vense a praia da Lanzada, o istmo de area que converte ao Grove en península, a costa de Sanxenxo e, ao fondo, a ría de Pontevedra e as illas Atlánticas.
Aos seus pés esténdese o Complexo intermareal Umia-O Grove, humidal Ramsar e zona ZEPA onde pasan parte do ano numerosas aves migratorias. Con marea baixa distínguense os restos das antigas «telleiras», fábricas de tellas, e as lagoas de onde se sacaba o barro.
- Xunto ao miradoiro: a Pedra Cabaleira, un gran bloque de granito en equilibrio, e a Aula da Natureza, centro de interpretación sobre aves, mareas e cetáceos.
- Como chegar: en coche ata o aparcadoiro da cima, ou a pé pola ruta circular que sobe desde a antiga canteira de Raimundo Vázquez.